លោក ម៉េង ស្រ៊ុន ដឹកនាំក្រុមការងារគណបក្សចុះមូលដ្ឋានឃុំអមលាំង បើកកិច្ចប្រជុំប្រចាំខែ ដើម្បីពិនិត្យបញ្ហាប្រឈម និងលើកទិសដៅការងារបន្ត...

ខេត្តកំពង់ស្ពឺ÷នាព្រឹកថ្ងៃសៅរ៍ ១កើត ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១២ ខែកញ្ញា ឆ្នាំ២០២៦ លោក ម៉េង ស្រ៊ុន សមាជិកគណៈអចិន្ត្រៃយ៍ នៃគណៈកម្មាធិការគណបក្សខេត្តកំពង់ស្ពឺ ប្រធានក្រុមការងារគណបក្សចុះមូលដ្ឋានឃុំអមលាំង និងជាប្រធានគណៈកម្មការគ្រប់គ្រងសមាជិក ខ២៦.២ បានដឹកនាំក្រុមការងារចុះមូលដ្ឋានឃុំអមលាំងទាំង ១៣ភូមិ ដើម្បីរៀបចំកិច្ចប្រជុំជីវភាពបក្សប្រចាំខែ និងលើកទិសដៅការងារសម្រាប់ខែបន្ទាប់។

កិច្ចប្រជុំត្រូវបានរៀបចំឡើងតាមភូមិនីមួយៗ ក្នុងគោលបំណងពិនិត្យ និងស្វែងរកបញ្ហាប្រឈមនានា ព្រមទាំងស្វែងរកដំណោះស្រាយឱ្យបានសមស្រប និងវាយតម្លៃស្ថានភាពទូទៅក្នុងមូលដ្ឋានឃុំអមលាំង ស្រុកថ្ពង ខេត្តកំពង់ស្ពឺ។

ភូមិទាំង ១៣ ដែលក្រុមការងារចុះប្រជុំរួមមាន៖ ភូមិគោក, ភូមិអូរអង្គំ, ភូមិទឹកចេញ, ភូមិពិស, ភូមិក្រាំងចំបក់, ភូមិក្រាំងដូង, ភូមិព្រៃជ្រៅ, ភូមិតាំងសំរោង, ភូមិតាំងហោង, ភូមិកុមារមាស, ភូមិថ្នល់បំបែក, ភូមិស្នួល និងភូមិថ្មគប់។

ក្នុងកិច្ចប្រជុំតាមបណ្តាភូមិនីមួយៗ លោកប្រធានក្រុមការងារ បានណែនាំ និងផ្សព្វផ្សាយដល់ក្រុមការងារមូលដ្ឋានឱ្យបន្តយកចិត្តទុកដាក់លើការងារសំខាន់ៗមួយចំនួន ដូចជា៖ ការចែកបណ្ណព័ត៌មាន និងបញ្ជីឈ្មោះបោះឆ្នោតជូនសមាជិកឱ្យបានគ្រប់ៗគ្នា ព្រមទាំងជួយជំរុញប្រជាពលរដ្ឋដែលគ្រប់អាយុបោះឆ្នោត ឱ្យទៅចុះឈ្មោះបោះឆ្នោតតាមនីតិវិធី។

ជាមួយគ្នានេះ ក្រុមការងារត្រូវបន្តធ្វើជាគំរូល្អ ពង្រឹងសីលធម៌ និងការទទួលខុសត្រូវក្នុងមូលដ្ឋាន ពិនិត្យ និងរៀបចំឯកសារចាំបាច់សម្រាប់ការចុះឈ្មោះ និងការបោះឆ្នោត ព្រមទាំងជំរុញឱ្យប្រជាពលរដ្ឋទៅពិនិត្យ និងផ្ទៀងផ្ទាត់ព័ត៌មានក្នុងបញ្ជីឈ្មោះបោះឆ្នោតឱ្យបានត្រឹមត្រូវ។

លោក ម៉េង ស្រ៊ុន ក៏បានលើកឡើងពីការយកចិត្តទុកដាក់លើការងាររដ្ឋបាល និងការសម្រួលឯកសារផ្សេងៗ ជាពិសេសការជួយសម្រួលសៀវភៅគ្រួសារ និងឯកសារពាក់ព័ន្ធជូនប្រជាពលរដ្ឋ ដើម្បីជួយឱ្យការអនុវត្តការងារនៅមូលដ្ឋានកាន់តែមានប្រសិទ្ធភាព។

សម្រាប់ទិសដៅការងារបន្ត លោកបានណែនាំឱ្យលោកមេភូមិ និងក្រុមការងារតាមមូលដ្ឋាន បន្តផ្សព្វផ្សាយ និងជំរុញប្រជាពលរដ្ឋដែលគ្រប់អាយុឱ្យទៅចុះឈ្មោះបោះឆ្នោត និងពិនិត្យផ្ទៀងផ្ទាត់បញ្ជីឈ្មោះបោះឆ្នោត ឱ្យបានគ្រប់ៗគ្នា ចាប់ពីថ្ងៃទី៧ ខែតុលា រហូតដល់ថ្ងៃទី៣០ ខែវិច្ឆិកា ឆ្នាំ២០២៦៕