ដោយទទួលបានបទបញ្ជាដ៏ខ្ពង់ខ្ពស់ពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល លោកវរសេនីយ៍ទោ ហង់ នរិទ្ធ អធិការនៃអធិការដ្ឋាននគរបាលស្រុកលើកដែក បានដឹកនាំកម្លាំងចុះអន្តរាគមន៍ និងចូលរួមសហការជួយពន្លត់អគ្គិភ័យដ៏ធំមួយនៅស្រុកពាមរក៍ ខេត្តព្រៃវែង....

អគ្គិភ័យដ៏ធំឆាបឆេះផ្ទះប្រជាពលរដ្ឋ ៥ខ្នង! លោកវរសេនីយ៍ទោ ហង់ នរិទ្ធ ដឹកនាំកម្លាំងចុះអន្តរាគមន៍ផ្ទាល់ ជួយពន្លត់នៅស្រុកពាមរក៍...

ព្រៃវែង៖ ដោយទទួលបានបទបញ្ជាដ៏ខ្ពង់ខ្ពស់ពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល លោកវរសេនីយ៍ទោ ហង់ នរិទ្ធ អធិការនៃអធិការដ្ឋាននគរបាលស្រុកលើកដែក បានដឹកនាំកម្លាំងចុះអន្តរាគមន៍ និងចូលរួមសហការជួយពន្លត់អគ្គិភ័យដ៏ធំមួយនៅស្រុកពាមរក៍ ខេត្តព្រៃវែង។

ហេតុការណ៍នេះបានកើតឡើងនៅវេលាម៉ោង ១២៖០៥នាទីរសៀល ថ្ងៃទី២៧ ខែសីហា ឆ្នាំ២០២៦ នៅចំណុចភូមិលេខ២ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង បណ្តាលឱ្យអគ្គិភ័យឆាបឆេះ និងប៉ះពាល់ផ្ទះប្រជាពលរដ្ឋចំនួន ៥ខ្នង។

ក្នុងនោះ ផ្ទះចំនួន ១ខ្នងត្រូវបានឆេះខូចខាតទាំងស្រុង ខណៈផ្ទះចំនួន៤ខ្នងទៀតរងការខូចខាតប្រមាណ ៧០%, ៨០%, ៣០% និង២០% ដោយសាររោល និងផ្សែងអណ្ដាតភ្លើង។

តាមការបញ្ជាក់ជាបឋម ករណីអគ្គិភ័យនេះត្រូវបានសង្ស័យថា បណ្តាលមកពី ទុស្សេខ្សែភ្លើង ខណៈម្ចាស់ផ្ទះមានមុខរបរលក់ និងបញ្ចូលធុងហ្គាស ដែលធ្វើឱ្យស្ថានការណ៍កាន់តែមានហានិភ័យ។

ក្រោយទទួលបានបទបញ្ជា លោកវរសេនីយ៍ទោ ហង់ នរិទ្ធ បានដឹកនាំកម្លាំងចុះអន្តរាគមន៍ និងសហការជាមួយកម្លាំងពាក់ព័ន្ធ ដើម្បីគ្រប់គ្រង និងពន្លត់អគ្គិភ័យ រហូតអាចគ្រប់គ្រងស្ថានការណ៍បាន ១០០%។

ជាសំណាងល្អ ក្នុងហេតុការណ៍នេះ មិនមានប្រជាពលរដ្ឋណាម្នាក់រងគ្រោះថ្នាក់ដល់អាយុជីវិតឡើយ។

👉 សូមបងប្អូនប្រជាពលរដ្ឋបង្កើនការប្រុងប្រយ័ត្នចំពោះប្រព័ន្ធអគ្គិសនី និងការរក្សាទុកសម្ភារៈងាយឆេះ ជាពិសេសនៅតាមផ្ទះដែលប្រកបអាជីវកម្មពាក់ព័ន្ធនឹងហ្គាស ដើម្បីបង្ការហានិភ័យអគ្គិភ័យដែលអាចកើតឡើងដោយមិនបានរំពឹងទុក៕

(សូមអានបន្ត)

ដោយអនុវត្តតាមបទបញ្ជាចង្អុលដឹកនាំដ៏ខ្ពង់ខ្ពស់ របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញជាអធិបតីក្នុងពិធីប្រកាសផ្ទេរភារកិច្ច តែងតាំងមុខតំណែងថ្នាក់អធិការ និងនាយប៉ុស្តិ៍នគរបាលរដ្ឋបាលព្រែកដាច់ នៃអធិការដ្ឋាននគរបាលស្រុកលើកដែក នៅសាលប្រជុំសាលាស្រុកលើកដែក....

នៅរសៀលថ្ងៃសុក្រ ១កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៤ ខែសីហា ឆ្នាំ២០២៦ដោយអនុវត្តតាមបទបញ្ជាចង្អុលដឹកនាំដ៏ខ្ពង់ខ្ពស់ របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញជាអធិបតីក្នុងពិធីប្រកាសផ្ទេរភារកិច្ច តែងតាំងមុខតំណែងថ្នាក់អធិការ និងនាយប៉ុស្តិ៍នគរបាលរដ្ឋបាលព្រែកដាច់ នៃអធិការដ្ឋាននគរបាលស្រុកលើកដែក នៅសាលប្រជុំសាលាស្រុកលើកដែក ដែលមានការអញ្ជើញចូលរួមជាគណៈអធិបតីពី លោក សោម ផល្លា ប្រធានក្រុមប្រឹក្សាស្រុកលើកដែក និងលោក ចាប ច័ន្ទវិទ្យា អភិបាល នៃគណៈអភិបាលស្រុកលើកដែក និងសមាសភាពចូលរួមពី លោកស្នងការរង លោកនាយការិយាល័យជំនាញ អធិការរង-នាយ-នាយរងផ្នែក នាយប៉ុស្តិ៍  ចំណុះឱ្យអធិការដ្ឋាននគរបាលស្រុកលើកដែក ផងដែរ។

នៅក្នុងឱកាសនោះដែរ លោកឧត្តមសេនីយ៍ទោស្នងការ បានមានប្រសាសន៍ណែនាំដល់លោកអធិការ និងលោកនាយប៉ុស្តិ៍ដែលទើបតែទទួលបានការតែងតាំង គឺត្រូវតែខិតខំបំពេញការងារឱ្យបានល្អ រក្សានិរន្តរភាពការងារឲ្យបានកាន់ល្អប្រសើរថែមទៀត មានការសាមគ្គីភាពក្នុងអង្គភាព បំពេញការងារតាមតួនាទីភារកិច្ចដែលថ្នាក់ដឹកនាំប្រគល់ជូនក្នុងនោះ៖
-ត្រូវផ្តោតសំខាន់លើការងាររក្សាសន្តិសុខ សណ្តាប់ធ្នាប់ និងការផ្តល់សេវាជូនប្រជាពលរដ្ឋ នៅក្នុងមូលដ្ឋានរបស់ខ្លួនឱ្យបានល្អប្រសើរ
-ពង្រឹងបន្ថែមការអនុវត្តគោលនយោបាយភូមិ-ឃុំ/សង្កាត់មានសុវត្ថិភាព
-តាមដានព័ត៌មានបំពុលសង្គម ព័ត៌មានមិនពិត និងធ្វើការបន្សាបព័ត៌មាននោះ
-ត្រូវប្រមូលផ្តុំកម្លាំងត្រៀមសហការអន្តរាគមន៍ពេលមានគ្រោះមហន្តរាយ ដូចជាទឹកជំនន់ និងជំងឺឆ្លងនានា
-ត្រូវយកចិត្តទុកដាក់សិក្សាស្វែងយល់ និងអនុវត្តអនុក្រឹត្យលេខ០៣ និងប្រកាសអន្តរ ក្រសួង ក្នុងនោះត្រូវចុះធ្វើរដ្ឋបាល និងធ្វើបច្ចុប្បន្នភាពបញ្ជីគ្រប់គ្រងទីតាំងស្នាក់នៅប្រមូលផ្តុំឱ្យបានរៀងរាល់៣ខែម្តង
-ត្រូវរៀនប្រើប្រាស់APP FPCS គ្រប់គ្រងជនបរទេស និងកម្មវិធីសុំវត្តមាន APP VATTMEAN
-ទូដាក់ឯកសារត្រូវទុកនៅក្នុងបន្ទប់ មានសោរចាក់ ដើម្បីរក្សាសុវត្ថិភាព ចៀសវាងការ បាត់បង់ ឬខូចខាត
-គ្រប់ប៉ុស្តិ៍ទាំងអស់ត្រូវរៀបចំសណ្តាប់ធ្នាប់របៀបរៀបរយ អនាម័យ កន្លែងផ្តល់សេវាជូន ប្រជាពលរដ្ឋ បន្ទប់ធ្វើការ បន្ទប់ទឹក និងបរិវេណជុំវិញប៉ុស្តិ៍
-ត្រូវកែលម្អលាបថ្នាំអគារស្នាក់ការប៉ុស្តិ៍ជាប្រចាំ (សក្តិសមជាកន្លែងបំពេញការងារ)
-ត្រូវមានកន្លែងស្នាក់នៅរបស់មន្ត្រីប៉ុស្តិ៍ដាច់ដោយឡែក និងត្រូវរក្សាអនាម័យ មានទូរដាក់ សម្លៀកបំពាក់ឱ្យបានត្រឹមត្រូវ និងរៀបចំផ្ទះបាយឱ្យបានសមរម្យ
-ត្រូវរៀបចំបន្ទប់ប្រចាំការ បន្ទប់សួរចម្លើយ ឱ្យបានគ្រប់ប៉ុស្តិ៍
-ត្រូវបំពាក់កាមេរ៉ាបន្ថែមនៅក្នុងប៉ុស្តិ៍ និងតាមតំបន់ងាយរងគ្រោះ។

បន្ថែមពីនេះលោកឧត្តមសេនីយ៍ទោស្នងការក៏បានបញ្ជាក់ម្តងទៀតផងដែរ នឹងឧត្ថម្ភថវិកា៤០ម៉ឺនរៀល ក្នុង១ដីកា ក្នុងការស្រាវជ្រាវចាប់មុខសញ្ញា ឬជនល្មើស  ជូនដល់អធិការដ្ឋាននគរបាលស្រុក/ក្រុង ដើម្បីជាការលើកទឹកចិត្ត។

ជាចុងក្រោយ លោកឧត្តមសេនីយ៍ទោស្នងការបានពាំនាំប្រសាសន៍ផ្តាំផ្ញើសួរសុខទុក្ខ និងឧបត្ថម្ភនូវគ្រឿងឧបភោគបរិភោគរួមមានអង្ករ១តោន ទឹកសុទ្ធ២០កេស មី២០កេស ត្រីខ១កេស រួមទាំងថវិកាដែលជាអំណោយដ៏ថ្លៃថ្លារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ជូនដល់អធិការដ្ឋាននគរបាលស្រុកលើកដែកផងដែរ៕

(សូមអានបន្ត)

មិនភ្លេចប្រជាពលរដ្ឋ! អតីតអភិបាលខណ្ឌពោធិ៍សែនជ័យ ឯកឧត្តម ហែម ដារិទ្ធ ដឹកនាំក្រុមការងារចែកអំណោយជូនគ្រួសារក្រីក្រ ២៥គ្រួសារ...

ភ្នំពេញ៖ ទោះបីបានបញ្ចប់តួនាទីជាអភិបាលខណ្ឌពោធិ៍សែនជ័យ និងកំពុងបំពេញភារកិច្ចថ្មីក្នុងក្រសួងមហាផ្ទៃក៏ដោយ ប៉ុន្តែឯកឧត្តម ហែម ដារិទ្ធ នៅតែបន្តបង្ហាញពីការយកចិត្តទុកដាក់ និងមិនភ្លេចសុខទុក្ខរបស់ប្រជាពលរដ្ឋក្នុងមូលដ្ឋានដែលលោកធ្លាប់ដឹកនាំ ថ្ងៃនេះឯកឧត្តមបានដឹកនាំក្រុមការងារនាំយកអំណោយមនុស្សធម៌ចែកជូនគ្រួសារក្រីក្រចំនួន ២៥គ្រួសារ ស្មើនឹង ៥០នាក់។

ពិធីចែកអំណោយនេះ បានប្រព្រឹត្តទៅនាព្រឹកថ្ងៃសៅរ៍ ទី១ ខែសីហា ឆ្នាំ២០២៦នៅក្នុងបរិវេណសាលាបុណ្យភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ក្រោមវត្តមានឯកឧត្តម ហែម ដារិទ្ធ អគ្គនាយករង នៃអគ្គនាយកដ្ឋានសវនកម្មផ្ទៃ ក្រសួងមហាផ្ទៃ ដោយមានការចូលរួមពីលោក ផុន សុផាន អភិបាលរងខណ្ឌពោធិ៍សែនជ័យ តំណាងដ៏ខ្ពង់ខ្ពស់លោករបស់សក់ ច័ន្ទកញ្ញារិទ្ធ អភិបាលនៃគណៈអភិបាលខណ្ឌពោធិ៍សែនជ័យ លោក កង វង ចៅសង្កាត់ចោមចៅទី១ និងតំណាងក្រុមហ៊ុន ខ្មែរ អេចប្រេស។

ថ្លែងក្នុងឱកាសនោះ ឯកឧត្តម ហែម ដារិទ្ធ បានលើកឡើងថា អំណោយដែលយកមកចែកជូននាពេលនេះ ទោះបីមិនមានតម្លៃធំដុំក៏ដោយ ប៉ុន្តែជាការបង្ហាញពីទឹកចិត្ត ក្តីស្រឡាញ់ ការចែករំលែក និងសាមគ្គីភាពពីសប្បុរសជន ដែលមានបំណងរួមចំណែកសម្រាលការលំបាករបស់បងប្អូនប្រជាពលរដ្ឋ។

ឯកឧត្តមបានបញ្ជាក់ថា ទោះបីបច្ចុប្បន្នលោកកំពុងបំពេញតួនាទីថ្មីក៏ដោយ ប៉ុន្តែក្នុងនាមជាអតីតអភិបាលខណ្ឌពោធិ៍សែនជ័យ លោកនៅតែមានមនោសញ្ចេតនា និងការនឹករលឹកចំពោះប្រជាពលរដ្ឋក្នុងមូលដ្ឋាននេះជានិច្ច ហើយនឹងបន្តចូលរួមសកម្មភាពមនុស្សធម៌ និងគាំទ្រការងាររបស់អាជ្ញាធរមូលដ្ឋាន ដើម្បីជាប្រយោជន៍ដល់ប្រជាពលរដ្ឋ។

ជាមួយគ្នានេះ ឯកឧត្តមក៏បានអំពាវនាវឱ្យប្រជាពលរដ្ឋយកចិត្តទុកដាក់ថែរក្សាសុខភាព រស់នៅស្អាត មានអនាម័យ និងបន្តសាមគ្គីគ្នានៅក្នុងសហគមន៍ ដើម្បីរួមគ្នាកសាងមូលដ្ឋានឱ្យកាន់តែរីកចម្រើន។

ឯកឧត្តម ហែម ដារិទ្ធ ក៏បានថ្លែងអំណរគុណដល់ក្រុមហ៊ុន ខ្មែរ អេចប្រេស ដែលបានឧបត្ថម្ភសម្ភារៈ និងថវិកា សហការជាមួយអាជ្ញាធរមូលដ្ឋាន ក្នុងការជួយដល់គ្រួសារក្រីក្រ និងគ្រួសារខ្វះខាតនៅក្នុងខណ្ឌពោធិ៍សែនជ័យ។

សូមបញ្ជាក់ថា អំណោយដែលប្រជាពលរដ្ឋម្នាក់ៗទទួលបាន រួមមាន អង្ករ ១បាវ (២៥គីឡូក្រាម) អាវចំនួន ២ ខោចំនួន ១ និងថវិកាចំនួន ៥ម៉ឺនរៀល ដើម្បីជួយសម្រាលបន្ទុកក្នុងជីវភាពរស់នៅប្រចាំថ្ងៃ៕

(អត្ថបទដោយ÷ប៊ុនធឿនហៅខ្លាពីរ)

(សូមអានបន្ត)