លោកឧត្តមសេនីយ៍ទោ ឈឿន ប៊ុនឆន អញ្ជើញដឹកនាំប្រតិភូ ស្នងការដ្ឋាននគរបាលខេត្តព្រៃវែង ទៅចូលរួម អបអរសាទរ និងជូនពរឆ្នាំថ្មីប្រពៃណីជាតិវៀតណាមឆ្នាំ ២០២៦...

ខេត្តព្រៃវែង ៖ ថ្ងៃអង្គារ ៨រោច ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១០ ខែកុម្ភៈ ឆ្នាំ២០២៦ថ្ងៃនេះ លោកឧត្តមសេនីយ៍ទោ ឈឿន ប៊ុនឆន ស្នងការ នៃស្នងការដ្ឋាននគរបាលខេត្តព្រៃវែង អញ្ជើញដឹកនាំលោកស្នងការរង និងគណប្រតិភូ នៃស្នងការដ្ឋាននគរបាលខេត្តព្រៃវែង ទៅចូលរួម អបអរសាទរ និងជូនពរឆ្នាំថ្មីប្រពៃណីជាតិវៀតណាម ឆ្នាំ២០២៦ នៅមន្ទីរនគរបាល និងយោធាខេត្ដដុងថាប់ ដោយរយៈពេលកន្លងមកខេត្តយើងទាំងពីរមានកិច្ចសហប្រតិបត្តិការ រវាងនគរបាលខេត្តព្រៃវែង និងនគរបាលខេត្តដុងថាប់ ព្រមទាំងមន្ទីរយោធាខេត្តដុងថាប់ បានអនុវត្តខ្លឹមសារសហប្រតិបត្តិការ ទប់ស្កាត់បទល្មើសតាមតំបន់ព្រំដែន ដោយភាគីទាំងពីរ បានសហការ ការពារ សុវត្ថិភាព សន្តិសុខ សណ្ដាប់ធ្នាប់នៅតាមតំបន់ព្រំដែន និងបានសហការដោះស្រាយរាល់ឧបទ្ទវហេតុ នានា ដែលកើតឡើងមានឡើងនៅតាមតំបន់ព្រំដែនអោយមានសុវត្ថិភាព និងសន្តិភាព រួមគ្នានាពេលកន្លងមក ។

គូបញ្ជាក់ថា  រវាងខេត្តទាំងពីរ ព្រៃវែង- ដុងថាប់ ក៏មានព្រំប្រទល់ជាប់គ្នា  ធ្លាប់មានប្រពៃណីជួយឧបត្ថម្ភគ្នាទៅវិញទៅមក ដែលនាំឱ្យយើងរក្សាបានយ៉ាងល្អប្រសើរ នូវចំណងមិត្តភាព សាមគ្គីភាព និងប្រែក្លាយខេត្តទាំងពីរឲ្យមានការរីកចម្រើន និងការអភិវឌ្ឍន៍  បន្ថែមទៀត ។

ស្ថិតក្នុងឱកាស ប្រពៃណីជាតិវៀតណាម ឆ្នាំ ២០២៦ ខាងមុខដ៏ខ្លីនេះ ក្នុងនាមថ្នាក់ដឹកនាំស្នងការដ្ឋាននគរបាលខេត្តព្រៃវែង និងប្រតិភូទាំងអស់ សូមប្រសិទ្ធពរជ័យ ជូនលោកនាយកមន្ទីរ ថ្នាក់ដឹកនាំ កងកម្លាំង ព្រមទាំងក្រុមគ្រួសារ នៃមន្ទីរនគរបាល និងយោធាខេត្តដុងថាប់ និងប្រជាពលរដ្ឋវៀតណាមទាំងអស់ សូមសុខមាលភាពបរិបូណ៌ ទទួលបានជោគជ័យគ្រប់ភារកិច្ច ក្នុងឱកាសបុណ្យចូលឆ្នាំថ្មីនេះ សូមឱ្យចំណងមិត្តភាព រវាងនគរបាលខេត្តទាំងពីរ ពីមួយថ្ងៃទៅមួយថ្ងៃ កាន់តែមានភាពជិតស្និទ្ធ ក្នុងការអភិវឌ្ឍន៍ និងរីកចម្រើនជាដរាប ៕