លោកឧត្តមសេនីយ៍ទោ ឈឿន សុចិត្ត ដឹកនាំកម្លាំងនគរបាលខេត្តកណ្តាល ការពារសន្តិសុខយ៉ាងតឹងរ៉ឹង ក្នុងពិធីជូនដំណើរ សម្តេចធិបតី ហ៊ុន ម៉ាណែត អញ្ជើញបំពេញទស្សនកិច្ចការងារ និងចូលរួមសន្និសីទពិភពលោកស្តីពីបញ្ញាសិប្បនិម្មិត (WAIC 2026) នៅប្រទេសចិន...

កណ្តាល៖ នៅព្រឹកថ្ងៃពុធ ១កើត ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៥ ខែកក្កដា ឆ្នាំ២០២៦ ដោយអនុវត្តតាមបទបញ្ជា និងការចង្អុលដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម គួច ចំរើន អភិបាល នៃគណៈអភិបាលខេត្តកណ្តាល លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញចូលរួម និងដឹកនាំកងកម្លាំងនគរបាលក្រោមឱវាទ សហការការពារ សន្តិសុខ សណ្តាប់ធ្នាប់ និងសុវត្ថិភាព នៅអាកាសយានដ្ឋានអន្តរជាតិតេជោ ក្នុងពិធីជូនដំណើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ក្នុងឱកាសនេះ សម្តេចមហាបវរធិបតី ហ៊ុន ម៉ាណែត បានដឹកនាំគណៈប្រតិភូជាន់ខ្ពស់ អញ្ជើញបំពេញទស្សនកិច្ចការងារនៅរដ្ឋធានីប៉េកាំង និងអញ្ជើញចូលរួម សន្និសីទពិភពលោកស្តីពីបញ្ញាសិប្បនិម្មិត ឆ្នាំ២០២៦ (World Artificial Intelligence Conference 2026 – WAIC) ដែលប្រព្រឹត្តទៅនៅទីក្រុងសៀងហៃ នៃសាធារណរដ្ឋប្រជាមានិតចិន ចាប់ពីថ្ងៃទី១៥ ដល់ថ្ងៃទី១៧ ខែកក្កដា ឆ្នាំ២០២៦។

ដោយអនុវត្តតាមផែនការការពារដែលបានដាក់ចេញ កងកម្លាំងនគរបាលខេត្តកណ្តាល បានសហការយ៉ាងជិតស្និទ្ធជាមួយកងកម្លាំង និងអង្គភាពពាក់ព័ន្ធ ដើម្បីធានាបាននូវសន្តិសុខ សុវត្ថិភាព សណ្តាប់ធ្នាប់សាធារណៈ និងសម្រួលចរាចរណ៍ ប្រកបដោយប្រសិទ្ធភាព ធ្វើឱ្យពិធីជូនដំណើរថ្នាក់ដឹកនាំកំពូលរាជរដ្ឋាភិបាល ប្រព្រឹត្តទៅដោយរលូន សុវត្ថិភាព និងទទួលបានជោគជ័យ។

សកម្មភាពនេះបានបង្ហាញពីការត្រៀមខ្លួនរួចជាស្រេច ភាពម្ចាស់ការ វិន័យ និងវិជ្ជាជីវៈខ្ពស់របស់កងកម្លាំងនគរបាលខេត្តកណ្តាល ក្នុងការបំពេញភារកិច្ចការពារថ្នាក់ដឹកនាំជាតិ និងព្រឹត្តិការណ៍សំខាន់ៗ ស្របតាមបទបញ្ជារបស់ថ្នាក់ដឹកនាំ និងដោយឈរលើស្មារតីទទួលខុសត្រូវខ្ពស់៕

អត្ថបទ៖ ប៊ុន ធឿន ហៅខ្លាពីរ
រូបភាព៖ ក្រុមការងារស្នងការដ្ឋាននគរបាលខេត្តកណ្តាល

(សូមអានបន្ត)

ស្នងការនគរបាលខេត្តកណ្តាល ចូលរួមកិច្ចប្រជុំបូកសរុបលទ្ធផលអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ប្រចាំឆមាសទី១ ឆ្នាំ២០២៦ និងដាក់ចេញទិសដៅការងារបន្ត...

នាព្រឹកថ្ងៃអង្គារ ១៥រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៤ ខែកក្កដា ឆ្នាំ២០២៦ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញចូលរួមកិច្ចប្រជុំបូកសរុបលទ្ធផលការងារនៃការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ប្រចាំឆមាសទី១ ឆ្នាំ២០២៦ និងលើកទិសដៅអនុវត្តការងារបន្តរបស់រដ្ឋបាលខេត្តកណ្តាល។

កិច្ចប្រជុំដ៏មានសារៈសំខាន់នេះ ប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ឯកឧត្តម អង មង្គល រដ្ឋលេខាធិការក្រសួងមហាផ្ទៃ និង ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល ដោយមានការចូលរួមពីថ្នាក់ដឹកនាំ មន្ត្រីជំនាញ កងកម្លាំងប្រដាប់អាវុធ និងអាជ្ញាធរពាក់ព័ន្ធគ្រប់លំដាប់ថ្នាក់ នៅសាលប្រជុំសាលាខេត្តកណ្តាល។

កិច្ចប្រជុំបានផ្តោតលើការពិនិត្យ វាយតម្លៃ និងបូកសរុបលទ្ធផលការងារដែលសម្រេចបានក្នុងការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ក្នុងឆមាសទី១ ឆ្នាំ២០២៦ ព្រមទាំងពិភាក្សាអំពីបញ្ហាប្រឈម វិធានការដោះស្រាយ និងដាក់ចេញទិសដៅការងារសម្រាប់ឆមាសទី២ ឆ្នាំ២០២៦ ដើម្បីបន្តលើកកម្ពស់ប្រសិទ្ធភាពការងារ និងធានាបាននូវសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។

ក្នុងឱកាសនោះ ថ្នាក់ដឹកនាំបានកោតសរសើរចំពោះកិច្ចខិតខំប្រឹងប្រែងរបស់រដ្ឋបាលខេត្ត កងកម្លាំងមានសមត្ថកិច្ច និងអាជ្ញាធរមូលដ្ឋាន ដែលបានរួមសហការអនុវត្តគោលនយោបាយរបស់រាជរដ្ឋាភិបាលប្រកបដោយការទទួលខុសត្រូវ និងទទួលបានលទ្ធផលជាវិជ្ជមាន។

ទន្ទឹមនឹងនេះ ក៏បានជំរុញឱ្យគ្រប់អង្គភាពពាក់ព័ន្ធបន្តពង្រឹងកិច្ចសហការ បង្កើនការបង្ការ ទប់ស្កាត់ និងបង្ក្រាបបទល្មើសគ្រប់ប្រភេទ ព្រមទាំងដោះស្រាយបញ្ហាប្រឈមនានាឱ្យបានទាន់ពេលវេលា ដើម្បីរក្សាបាននូវសុខសន្តិភាព និងផ្តល់ភាពកក់ក្តៅជូនប្រជាពលរដ្ឋ។

ការចូលរួមរបស់លោកឧត្តមសេនីយ៍ទោ ឈឿន សុចិត្ត ក្នុងកិច្ចប្រជុំនេះ បានបង្ហាញពីការយកចិត្តទុកដាក់ខ្ពស់របស់ស្នងការដ្ឋាននគរបាលខេត្តកណ្តាល ក្នុងការអនុវត្តគោលនយោបាយរបស់រាជរដ្ឋាភិបាល និងក្រសួងមហាផ្ទៃ ដោយបន្តរួមចំណែកថែរក្សាសន្តិសុខ សណ្តាប់ធ្នាប់សាធារណៈ និងបម្រើប្រជាពលរដ្ឋឱ្យកាន់តែមានប្រសិទ្ធភាព៕

(សូមអានបន្ត)